समोर तारा बघत रहा रे
अंधाराला भिऊ नको
सतत पुढे तू जात रहा रे
मागे वळुनी पाहू नको।।
ध्येय आपुले गाठायाला
आळस काही करू नको ।
कष्ट कराया, भिंत चढाया
थोडा सुद्धा दमू गको ।।
एक उसासा टाक जरासा
परंतु झोपी जाऊ नको ।
सतत पुढे तू...
असेल गर्दी हितशत्रूंची
थोडी पेरण हितबंधूंची ।
विचलितबुद्धी होउ न देण्या
आजुबाजुला पाहु नको ।।
परंतु येता हात मदतिचा
झिडकारुन तू सोडु नको ।
सतत पुढे तू...
प्रतिकूल ते घडते म्हणुनी
तयारि करणे सोडू नको ।
संकट येता मार्गावरती
अंगण सोडून पळु नको ।।
घट्ट धरे तो तरतो ऐसा
मंत्र मात्र तू विसरु नको ।
सतत पुढे तू...
सत्कार्ये तू करता मनसा
कीर्ती मागे राही बरे ।
यशगाथा तव गाउन कितीदा
स्फूर्ती सकलां मिळे बरे ।।
उगाळण्या परि आत्मगंड तू
क्षणभर सुद्धा थांबू नको ।
सतत पुढे तू...
- अनिरुद्ध रास्ते
