पावसाळ्यात घट्ट होतात दरवाजे..
दोष देतो आपण
पावसाला...
पण उंबर्यातच अडकून असतात,
भिजलेल्या काही आठवणी!
उन्हाळ्यात सैल पडतो दरवाजा..
तोही वाळून जातो,
सहज लागतो..
पण वाळून बिचार्या
तिथेच असतात पडलेल्या,
भिजलेल्या काही आठवणी!
लावलेल्या दरवाजाच्या
फटी तशाच राहतात...
गारठतात, कुडकुडतात,
तरीही अडकूनच राहतात...
भिजलेल्या काही आठवणी!
ऋतू येतात जातात..
उंबरेही झिजतात...
मनाची माती झाली
तरी अंकुरत नाहीत....
भिजलेल्या काही आठवणी!
-अनिरुद्ध रास्ते
