उमलत होतो भल्या सकाळी,
आईच्या मी अंगावरती
मानत होतो आभार तिचे अन्
सुगंध पसरुनी वार्यावरती
रंग उधळुनी भुलवित होतो
मधुमक्षीसह मी भ्रमरांना
नाजुक बोटे मज स्पर्शावी
अशीच होती मनी कामना!
हात एक नाजुकसा आला,
आः!! मजला तोडुन गेला,
टाकुन इतरांसह
परडीत
आनंदाने पुढे चालला!
किती कुळांची किती भावंडे
परडीमध्ये तशीच पडली
तुटली जरी का मातांपासुन
रंग,सुगंध उधळीत राहिली!
ताटातुट घडवून आमुची
प्रणया वा भक्तीला सजवी,
आवड असली अप्पलपोटी!
हीच तुझी का रीत मानवी?
