दुसर्‍या सत्राची तरुणाई आली
पुनर्जन्माची जणु नांदीच झाली
अनुभव, उत्साह घेऊन आली,
आली आली आली पन्नाशी आली!
युवाही नाही नि वृद्धही नाही,
उच्छृंखल नाही नि शिथिल नाही,
संयमासह शक्तीला घेऊन आली
आली आली आली पन्नाशी आली!
कुठे केसांना पांढरी किनार
कुठे नजरेला चाळीशी आधार
सुटलेली पोटं पट्यानी बांधली
आली आली आली पन्नाशी आली!
तूतूमैमै आता सोडून देऊ
मिळाले जे त्याचा आनंद घेऊ
हौसेने जगण्याची वेळ ही आली
आली आली आली पन्नाशी आली!
- अनिरुद्ध रास्ते
