अशीही एक गत...

खुंटी गेली, तुटल्या तारा
फुटे भोपळा, भरला कचरा
नादब्रह्मदूतांचा राजा
तानपुरा जग सोडुन गेला।।

कठोर कुणितरी कंटकहृदयी
कृतघ्न, अरसिक , पुरा निर्दयी
स्वरसाजाला टाकुन गेला
तानपुरा जग सोडुन गेला।।

'सारे' सोबती सोडुन गेले
स्वरगंगेचा आत्मा 'गम'ला
गंधार स्वयंभू  लोप पावला
तानपुरा जग सोडुन गेला।।

पाठ राखण्या गाणार्‍याची
असून नसला, तरी असणारा
नादपटलाचा रंगारी हा
तानपुरा जग सोडुन गेला।।

"देह जरी का माझा पडला,
जगवा आत्मा अमर स्वरांचा"
पुसता डोळे, तोच बोलला
तानपुरा जग सोडुन गेला।।

- अनिरुद्ध रास्ते