मैत्र पुरते बहरुन यावे!

ज्यांना येते काव्य त्यांनी, दोन कडवी लिहून द्यावी।
ज्यांना कळते रसमाधुर्य, त्यांनी मग दाद द्यावी।।

ज्यांना येते सूरसंगीत, त्यांनी थोडी चाल द्यावी।
ज्यांचा गळा गोड त्यांनी, एखाददुसरी तान द्यावी।।

येई तबलापेटी ज्यांना, त्यांनी सुंदर साथ द्यावी।
कानसेन जे असती येथे, त्यांनी समेला टाळी द्यावी।।

फुलून येण्यासाठी येथे, पुनर्भेटीचे कोंदण व्हावे
सर्वांसंगे देता घेता, मैत्र पुरते बहरुन यावे।।

-अनिरुद्ध रास्ते