मूर्तीलाही मुक्तीचा...

पाहता आकाश ते
पक्षी मनी झेपावले ।
हाय माझे कर्म की
मूर्ती म्हणुनी राहिले ।।

नीलिमा नभी दाटली
मुक्तिची परिकल्पना ।
बांधली काया परी
येई नशीबी वंचना ।।

जाउ दे मनपक्षी ते
त्यांस तरी का थांबवू?
बंधनाचे दुःख माझ्या
अजुन मी का वाढवू?

मुक्ती मिळुनी ते जरी
जाती उडुनी दूर का ।
फिरुनी माघारी परी
येती, मज विश्वास हा !

घेउनी येती सवे
मुक्तिच्या अनुभूतीला
मूर्तीलाही मुक्तीचा
आनंद क्षणभर भावला ।।

-अनिरुद्ध रास्ते

 (http://www.jean-pierre-augier.com/index.php/sculptures-monumentales La-Paix, Ilonse)