रक्त वाहते तुझेच देवा
या तारांच्या नसानसांतून।
उगा फुकाचा गर्व मानवी
वीज निर्मिली कशाकशातुन।।
तुझ्या बलाने अखंड घडती
महासागरीं भरती ओहोटी।
उगा फुकाचा गर्व मानवी
धरणे बांधुन नद्या अडविती।।
शक्ति तुझी विश्वाला धरते
ग्रहतार्यांचे नृत्य चालते।
उगा फुकाचा गर्व मानवी
उपग्रहांना यान स्थापते।।
तुझ्याच नजरेखाली झाडे
अन्न निर्मिती निर्जीवातुन।
उगा फुकाचा गर्व मानवी
सर्वोत्क्रांत स्वतःस समजुन।।
कृपया दावी विश्वरूप तें
क्षणात सर्वां परमज्ञान दे।
उगा फुकाचा गर्व मानवी
क्षुद्र किड्यासम नष्ट होउदे!!
-अनिरुद्ध रास्ते
