रसनारंजक सगळे...

रसनारंजक सगळे, दूरदेशींचे आले
अजमावित त्यांची क्षमता, खिसे रिकामे झाले
परि स्मरते आणिक करते व्याकुळ केव्हा
मिरची, भाकर, कांदा, झुणक्याचे गोळा पिठले।।

शमविण्या येथली भूक, खाद्याच्या सरती राशी
नाव कमविण्या गर्दी, मास्टरशेफांची खाशी
परि स्मरती आणिक करती व्याकुळ केव्हा
कर्मयोगी ते बेडेकर, चितळे, जोशी।।

अनंत यंत्रे, तंत्रे, असती काम कराया,
किमया अनेक करुनी, आळविती प्रगतीकाव्या,
परि स्मरती आणिक करती व्याकुळ केव्हा
त्या जात्यावरल्या, ब्रह्मप्रहरीच्या ओव्या।।

वसुधा फिरुनी मजा करा, घ्या भरून खाद्यानंद
खाउनी कधी व्हा तृप्त नाहितर पिऊन व्हा बेधुंद
परि स्मरतील आणिक करतील व्याकुळ केव्हा
घास आईचा, चव पाण्याची, अन् आपल्या मातीचा गंध।।

-अनिरुद्ध रास्ते