वसंत फुलला वनावनातुन
रंग प्रकृती खेळतसे
विविध फुलांतुन ओसंडुन ये
ऋतुराजाचे प्रेम असे।
पीतरंग हा रंगराज जणु
उत्सव त्याचा आज असे
फुल्ल धुमारे सांगत येती
राजाचे प्रतिहारी जसे।
अंश सांडला चंडांशुचा
झेलुन धरिती तरू शिरी
चालुन दमला रवी नभातच
घाम टपकला धरेवरी।
घोस फुलांचे बहरुन येती
उधळत पराग सगळिकडे
नवनवरीला हळद लागली
पिवळे कर तळहात गडे।
जेजुरगडचा खंडेराया
उत्साहाने जणु डोले
पहा वाटला प्रसाद त्याचा
येळकोटचे चांगभले।
वसंत उत्सव इथे मांडला
उत्साहे गाऊ गीत
पीतरंग हा सांगत आला
अमर तुझीमाझी प्रीत!
- अनिरुद्ध रास्ते
No comments:
Post a Comment