वाट आळशी दगडांमधली
माड गाळती अवखळ किरणे
गाज ऐकु ये चित्रामधुनी
ऐसे सुंदर कोकण जगणे!
या भूवर अपरांत जन्मला
भार्गवरामाच्या कृपेने,
पाचूं जडवुन पदरावरती
धरा नेसली हिरवी वसने!
सागरलाटा अखंड करिती
दंगामस्ती अतिनेमाने
कोकणभूच्या अंगावरती
सतत कोरती नाजुक लेणे
सह्यकड्यांची बघून छाती
जलद बरसती पुर्या दमाने,
अंगावरती घेऊन त्यांना
माड उरकती सचैल स्नाने!
यांवा कोंकण आंपलेंच हों
म्हणती किती जन आनंदाने
हिशेब करिती कणाकणाचा
लख्ख विजेच्या तत्परतेने!
गणरायावर अपार भक्ती
आंबे, काजू येथे पिकती
सागरात वा रानामध्ये
कुठेच खाणे नाही उणे!
वर्षामधुनी एकदातरी
धूळ येथली पायी लावणे
हृदयामध्ये भरून घेणे
ऐसे सुंदर कोंकण जगणे!!
-अनिरुद्ध रास्ते
No comments:
Post a Comment