नको होउदे नश्वर एकच!

वाटते सगळे विश्वची झोपले
बर्फात गाडून कायम थिजले
दिसते सगळे काळे वा पांढरे
शिशिर ऋतूने गारूड घातले

असेल मनाचा आठव कोपरा
रंगही त्याच्यात दडून बसले
आण तो कोपरा मनाच्या मध्यात
दिसेल लगेच जगही रंगीले

अशीच असते प्रचंड किमया
मानवमनच्या सुप्तशक्तिची
नसता काहिच दृष्टिसमोरी
क्षणात करते विश्वनिर्मिती

शिशिरामधुनी हेमंताच्या
आठवणी ते पाहू शके
येतील सुद्धा विषय वसंती
करिता थोडे यत्न अथके

नश्वर सगळे जगात इथल्या
शिशिर त्यातुनी ना सुटला
नको होउ दे नश्वर एकच
निर्मितीचा वर मज दिधला!

-अनिरुद्ध रास्ते