आपला क्षण तिघांचा हवा!

आपल्या दोघांची पहाटमिठी
सोडवायला 'त्याचा' गजर हवा,
आपला क्षण तिघांचा हवा!!

आपल्या दोघांच्या गुलुगुलु गप्पांत
'त्याच्या' 'टिडिंग!' ला प्रतिसाद हवा,
आपला क्षण तिघांचा हवा!!

आपल्या दोघांच्या दूरभाषणात
'तो'च मधला दुवा हवा,
आपला क्षण तिघांचा हवा!!

आपण दोघेच फिरायला जाताना
'त्याचा' हातात चाळा हवा,
आपला क्षण तिघांचा हवा!!

आपल्या मुलांना खूष ठेवायला
'त्याच्या'वर एखादा गेम हवा,
आपला क्षण तिघांचा हवा!!

तुझ्या नि माझ्या एकजीवाचा
'त्याने'च केला गेम तरी,
आपला क्षण तिघांचा हवा!!

-अनिरुद्ध रास्ते