शार्ड!

धुक्यात घुसला गगनचुंबी हा 'शार्ड' मनोरा!
आकाशाच्या मिठीत जाउनी जणु हा बसला
लाज लपविण्या लपेटून घे का शालीला?
नको दिसाया कुणास असला प्रणयमामला!

काही असो परी, कठिण लपविणे प्रेमधुमारे
सर्वांगावरी तरीच दिसती दीपशहारे
जगा सांगती बोंबलुनी ते पारददिवटे
नाही बरंका शार्ड-नभाचे प्रेमही खोटे

जरी वाटती उच्चाकांक्षी कठिण वृत्तीचे
हृदयी त्यांच्या भरून असते मार्दव साचे
ताठ उभा हा शार्ड इथे या लंडनापुरी
मजला दिसली नाजुक बाजू तया अंतरी!!

-अनिरुद्ध रास्ते