जरा शांत बसलो तर...

जरा शांत बसलो तर
बायका किती मदत करतात
'अहो ऐकलंत का' म्हणून
दहा वेळा डिस्टर्ब करतात

जाऊन भाजी घेऊन या
नाहीतर नारळ फोडून द्या
अहो जरा इकडे या
म्हणून काहीतरी काम काढतात
जरा शांत ...

कधी वाळत घाला कपडे
कधी सामान ठेवा तिकडे
हात नाही पोचत म्हणून
सारखे वरती चढायला लावतात
जरा शांत .....

माझा मोबाईल सवत जणु
तिचा मात्र मित्र खरा!
स्वतः मात्र सिरीयल पाहत
अर्धा स्वयंपाक करवून घेतात
जरा शांत ....

यांना खरेदीची हौस भारी
त्यातून फूस लावते दुसरी
लागता थोडा डोळा दुपारी
गावात गाडी हाकायला लावतात
जरा शांत ...

सर्वांसमोर जरी सांगतात,
सगळे निर्णय 'हे'च घेतात,
'मी काय म्हणते' असं म्हणून
'ह्या'च रीमोट कंट्रोल होतात
जरा शांत बसलो तर....

-अनिरुद्ध रास्ते