कविता: जरा हटके!

अशी दिसावी कविता सुंदर
मूर्तीमंत ती जणु अप्सरा ।
दोष नसावा कुठेच इतुका
कुठे नसावा किंचित नखरा।।

अशी दिसावी कविता सुंदर
रोज एकटी गच्चीवरती ।
वेळ अशीही जुळून यावी
कुणी नसावे अवतीभवती ।।

अशी दिसावी कविता सुंदर
मरुभूमीतिल निर्झर झुळझुळ ।
आसुसलेल्या नेत्रद्वयांची
सुसह्य करते थोडी तळमळ ।।

अशी दिसावी कविता सुंदर
सूर समेला जोडुन यावे ।
चुकार नजरेमधुनी बघता
हळुच तिनेही होय म्हणावे!!

- अनिरुद्ध रास्ते